D'Chamber geet nees lass: Méi Kannergeld a wichteg Gesetzesprojeten um Programm
No der Summerpaus geet et en Dënschdeg, den 13. Oktober, an der Chamber nees lass. Bis en Donneschdeg sti fënnef ëffentlech Sëtzungen um Programm. Dobäi soll och iwwer eng Rei wichteg Gesetzesprojete gestëmmt ginn.
Ee vun de Schwéierpunkte vun der parlamentarescher Rentrée ass d'Erhéijung vum Kannergeld. En Donneschdeg sollen d'Deputéiert iwwer de Gesetzesprojet ofstëmmen, deen eng Erhéijung vum 1. Januar 2027 u virgesäit. Fir Kanner bis 11 Joer soll et 45 Euro de Mount méi ginn, fir Kanner ab 12 Joer souguer 60 Euro. Och d'Allocation de rentrée scolaire soll eropgoen.
Wunnengsbau, Familljen an eng nei international Schoul
E Mëttwoch steet de sougenannte Remembrement ministériel um Programm. Domat soll et méi einfach ginn, Terrainen nei opzedeelen, fir Bauprojeten ëmzesetzen. Den CSV-Deputéierte Marc Lies ass Rapporteur vum Gesetzesprojet.
Och iwwer nei Reegelen am Beräich vun der Familljenzesummeféierung gëtt ofgestëmmt. Hei ass d'CSV-Deputéiert Stéphanie Weydert Rapportrice.
En Donneschdeg soll et ausserdeem gréng Luucht fir de Bau vun enger neier internationaler Schoul mat Internat zu Munneref ginn. Fir dëse Projet si ronn 210 Milliounen Euro virgesinn.
Vun der Gesondheet bis bei d'Aussepolitik
Nieft de Gesetzesprojeten diskutéiert d'Chamber iwwer eng Rei aktuell Themen. Dënschdes geet et ënner anerem ëm d'Klimakonferenz COP31, mëttwochs ëm d'Preventioun am Gesondheetsberäich, digital Souveränitéit vu Lëtzebuerg a Bëschbränn vum leschte Summer.
En Donneschdeg steet eng Debatt iwwer déi international Verpflichtungen an d'Verantwortung vu Lëtzebuerg um Programm, besonnesch am Zesummenhang mat der Situatioun an de besate palästinensesche Gebidder.
Weider Informatiounen zu de Sëtzungen, Debatten a Gesetzesprojete fannt Dir op chd.lu an am Chamberskalenner.