CHAMBERAARBECHT
Den Emile ass laangjärege President vum Gemengesyndikat Syvicol. Hie vertrëtt do d’Interessien net nëmme vun de Gemengen a Stied, mee virun allem vun de Bierger.
D’Vereinfache vun de Prozeduren op all Niveaue vum Liewe muss onbedéngt virugedriwwe ginn, fuerdert hien. En excellente Service um Bierger kéint nëmme geleescht ginn, wann och déi kommunal Servicer nei definéiert a professionaliséiert ginn. Do dru géing geschafft ginn. Dat geplangten nationaalt Bautereglement an d’Grondsteierreform si wichteg, fir am Logement virun ze kommen.
Als Spriecher fir de Beräich Mobilitéit begréisst hien, dass 1 Milliard Euro an d’Moderniséierung an den Ausbau vum Findel investéiert ginn. Aarbechte sinn ënnert anerem um Tower, dem Terminal a bei de Parkings-Méiglechkeete virgesinn. Fir d’Passagéier bedeit dat méi Confort a méi Sécherheet. Dernieft kréien och d’Awunner Hëllefe, wann si hir Haiser géint de Kaméidi isoléiere wëllen.
D’Gesetz fir déi zousätzlech Pëtrolslager ass gestëmmt.
Am Beräich vun den ëffentleche Bauten huet hien zum Gesetzprojet geschwat, mat deem de Klierfer Lycée vergréissert gëtt:
Ronn 109 Milliounen Euro ginn hei investéiert. D’Schülerpopulatioun soll vun 800 Schüler op bis zu 1.580 uwuessen.
Den Emile freet sech, weider Gesetzer am Beräich vum Transport an der Stroosseninfrastruktur, virun allem am Norden traitéieren ze kënnen.
